135

Տնային առաջադրանք

12 Մայիս 2020 03:24

Այսօր, մայիսի 12-ին Ազգային Ժողովը լսում էր Մարդու Իրավունքների Պաշտպանի տարեկան զեկույցը: Ելույթից հետո իշխանական թևի պատգամավորները անցան  Մարդու Իրավունքների Պաշտպանին միևնույն հարցով  խոշտանգելու գործընթացին: Ինչու Մարդու Իրավունքների Պաշտպանը չի պաշտպանում իշխող ուժի ներկայացուցիչների,  իշխող ուժի կին ներկայացուցիչների, իշխող ուժի ներկայացուցիչների կանանց իրավունքները:

Իսկապես, արդարացի հարց է առաջանում ինչու: Հարցին պատասխանելու համար փորձենք լուծել հետևյալ խնդիրը:

Ումից է պաշտպանում, կամ ումից պետք է պաշտպանի Մարդու Իրավունքների Պաշտպանը, ընդհանրապես մարդու իրավունքները և մասնավորապես  իշխող ուժի ներկայացուցիչների իրավունքները:

Խնդրի պատասխանը կարծում եմ շատերը գիտեն, այդ թվում նաև պատգամավորներից շատերը:

Այն պատգամավորները ովքեր գիտեն և գիտեն, որ գիտեն նրանք այդ կարգի հարցեր չէին տա Մարդու Իրավունքների Պաշտպանին:

Ովքեր գիտեն, բայց չգիտեն որ գիտեն, նրանք Մարդու Իրավունքների Պաշտպանին կտային ճշտող հարց իրենց իմացության վերաբերյալ:

Ովքեր չգիտեն և գիտեն, որ չգիտեն նրանք կփորձեին Մարդու Իրավունքների Պաշտպանից պարզել` ումից է  նա պաշտպանում մարդու իրավունքները:

Խնդիրը վերաբերում է Մարդու Իրավունքների Պաշտպանին խոշտանգող պատգամավորներին, ովքեր չգիտեն և չգիտեն, որ չգիտեն, թե ումից է պաշտպանում Մարդու Իրավունքների Պաշտպանը մարդու իրավունքները:

Խնդրի պայմանները:

 Ունենք`

• Հայաստանի Հանրապետության Սահմանադրություն

• Հայաստանի Հանրապետության օրենսդրություն, բազմաթիվ օրենքներով, մասնավորապես` քրեական, քրեադատավարական և քրեակատարողական օրենսդրություն,  վարչական իրավախախտումների մասին օրենսդրություն և այլն

• Իրավապահ մարմիններ` Ոստիկանություն, Դատախազություն, ՀՔԾ, ԱԱԾ և այլն:

Եթե խախտվում է մարդու, այդ թվում ՀՀ Նախագահի, Վարչապետի, ԱԺ պատգամավորների, մահկանցուներիս իրավունքները մեկ այլ մարդու, այդ թվում` ՀՀ Նախագահի, Վարչապետի, ԱԺ պատգամավորների, մահկանցուներիս կողմից, ապա գործում է ՀՀ Սահմանադրությունը, Օրենսդրությունը, որը իրականացնում են իրավապահ մարմինները:

Հարց` Ումից է պաշտպանում, կամ ումից պետք է պաշտպանի Մարդու Իրավունքների Պաշտպանը, ընդհանրապես մարդու իրավունքները և մասնավորապես  իշխող ուժի ներկայացուցիչների իրավունքները:

Տնային առաջադրանք պատգամավորներին ովքեր չգիտեն և չգիտեն, որ չգիտեն:

Կարող եք օգտվել գրականությունից, համացանցից, ՀՀ Սահմանադրությունից և Օրենսդրությունից:

Հ.Գ. ՄԻՊ Արման Թաթոյանը իր եզրափակիչ ելույթով ապացուցեց, որ իմքայլական պատգամավորների հետ գտնվում են մասնագիտական և ինտելեկտուալ տարբեր աստիճաններում։ Թաթոյանի ելույթը անհամեմատ շահեկան դիրքերից էր։

Արմեն Ստեփանյան