65

Տնային առաջադրանքի պատասխանը

Տնային առաջադրանքի պատասխանը

14 Մայիս 2020 09:55

Հիշեցնենք խնդրի պայմանները:

Ունենք`

• Հայաստանի Հանրապետության Սահմանադրություն

• Հայաստանի Հանրապետության օրենսդրություն, բազմաթիվ օրենքներով, մասնավորապես` քրեական, քրեադատավարական և քրեակատարողական օրենսդրություն, վարչական իրավախախտումների մասին օրենսդրություն և այլն։

• Իրավապահ մարմիններ` Ոստիկանություն, Դատախազություն, ՀՔԾ, ԱԱԾ և այլն:

Եթե խախտվում է մարդու, այդ թվում ՀՀ Նախագահի, Վարչապետի, ԱԺ պատգամավորների, մահկանցուներիս իրավունքները մեկ այլ մարդու, այդ թվում` ՀՀ Նախագահի, Վարչապետի, ԱԺ պատգամավորների, մահկանցուներիս կողմից, ապա գործում է ՀՀ Սահմանադրությունը, Օրենսդրությունը, որը իրականացնում են իրավապահ մարմինները:

Հարց` ումից է պաշտպանում, կամ ումից պետք է պաշտպանի Մարդու Իրավունքների Պաշտպանը, ընդհանրապես մարդու իրավունքները և մասնավորապես իշխող ուժի ներկայացուցիչների իրավունքները:

Լուծում`

Ումից է պաշտպանումը ընդունենք x:

Խնդիրը լուծելու համար մոդելավորենք մարդու իրավունքների խախտման դեպքեր և օգտագործելով բազմաթիվ հայտնիները կազմենք բանաձևեր:

Ընդունենք, որ ես իշխող ուժի պատգամավորներին, ովքեր չգիտեն և չգիտեն, որ չգիտեն անվանում եմ տգետ: Նրանք հայցով դիմում են դատարան`

• Դատարանը ընդունում է հայցը, լսում և կայացնում որոշում: Մարդու իրավունքները խախտված չեն:

• Դատարանը չի ընդունում հայցը պատճառաբարելով, որ այն անընթեռնելի է, չնայած որ հայցը ներկայացվել է մեքենագիր: Տեղի ունեցավ մարդու իրավունքների խախտում դատական իշխանության կողմից:

Կազմենք բանաձև` x = դատական իշխանությունից:

Շարունակենք` ընդունենք, որ ես իշխող ուժի պատգամավորներին, ովքեր չգիտեն և չգիտեն, որ չգիտեն, ոչ միայն անվանում եմ տգետ, այլև հոլովակ տեղադրում համացանցում, պատմելով նրանց անձնական կյանքի մասին:

Նրանք հանցագործության մասին հաղորդում են ներկայացնում ոստիկանություն`

• Ոստիկանությունը ընդունում է հաղորդումը, ուղարկում ՀՔԾ, որը քննում է կատարվածը, կազմում քրեական գործ, որով դատախազությունը մտնում է դատարան: Դատարանը լսում և կայացնում է որոշում: Մարդու իրավունքները խախտված չեն:

• Ոստիկանությունը չի արձագանքում հայտարարությանը: Տեղի ունեցավ մարդու իրավունքների խախտում ոստիկանության` գործադիր իշխանության կողմից:

Կազմենք բանաձև` x = գործադիր իշխանությունից:

Շարունակենք` ընդունենք, որ ես դիմում եմ ԱԺ ընդիմադիր ուժերին հանդես գալ օրենսդրական նախաձեռնությամբ`զրկել մանդատից իշխող ուժի տգետ պատգամավորներին:

Ընդիմադիր ուժերը ԱԺ են բերում օրենսդրական նախագիծ.

• Աժ մերժում է նախագիծը: Մարդու իրավունքները խախտված չեն:

• ԱԺ ընդունում է նախագիծը: Տեղի ունեցավ մարդու իրավունքների խախտում օրենսդիր իշխանության կողմից:

Կազմենք բանաձև` x = օրենսդիր իշխանությունից:

Եվ այսպես` x = դատական իշխանությունից

x = գործադիր իշխանությունից

x = օրենսդիր իշխանությունից

Կամ 3x = դատական իշխանությունից + գործադիր իշխանությունից + օրենսդիր իշխանությունից

Օգտագործենք ՀՀ Սահմանադրության 4 հոդվածը`

Հոդված 4. Իշխանությունների բաժանման եւ հավասարակշռման սկզբունքը

Պետական իշխանությունն իրականացվում է Սահմանադրությանը եվ օրենքներին համապատասխան՝ օրենսդիր, գործադիր եվ դատական իշխանությունների բաժանման ու հավասարակշռման հիման վրա:

Այսինքն պետական իշխանությունները = դատական իշխանություն + գործադիր իշխանություն + օրենսդիր իշխանություն, պետական իշխանությունները = 3 պետական իշխանություն։

Տեղադրենք մեր բանաձևի մեջ՝

3x = 3պետական իշխանությունից, x = պետական իշխանությունից

Պատասխան` պետական իշխանությունից:

Ապագայի, Հաղթած Հեղափոխության, Հայաստանում Մարդու Իրավունքների Պաշտպանը ըստ էության պետք է աշխատանք չունենա:

 

Արմեն Ստեփանյան