148

Գլխապտույտ

Գլխապտույտ

17 Մայիս 2020 02:55

Հեղափոխությանը մասնակցում էր ամբողջ ժողովուրդը: Անիմաստ էր թիվ հաշվել։ Հաշիվը կորցրած գնացին Ազգային Ժողովի ընտրությունների: Այնքան ձայն հավաքեցին, որ դրանից այն կողմ էլ հաշիվ չի: Եվ հաշիվը կորցրին անվերադարձ:

Ազգային ժողովը ընտրեց կառավարություն: Կառավարությունը ներկայացրեց ծրագիր: Ընդիմությունը փաստեց՝ «թվեր չկան», «հաշվարկներ չկան»: Կառավարությունն արդարացավ, թե «սա ռազմավարական ծրագիր է, մարտավարական ծրագրերը ներկայացնելուց թվեր էլ կներկայացնենք, հաշվարկներ էլ»: Ու գնաց կորցրած հաշվի հետևից։

Մինչև 2020թ. հոկտեմբեր 10 միլիոն ծառ ենք տնկելու: Իշխանությունները հաշիվը կորցրել են: Փորձենք մենք հաշվել: Ճանապարհների երկու կողմերին, 2մ հեռավորության վրա բարդիներ տնկենք: 1կմ ճանապարհի վրա ամեն կողմից 500 ծառ, ընդամենը 1000: 10 միլիոնը բաժանենք 1000-ի կստանանք 10000կմ՝ Երևանից Վլադիվոստոկ: Ինչ որ մի բան էն չի: Հիմնենք կաղնու, թխկենու, հաճարենու անտառ: Ծառերը պետք է լինեն գոնե 8մ հեռավորության վրա: Մի հեկտարի վրա կլինի մոտ 160 ծառ: 10 միլիոնը բաժանած 160-ի՝ 62500 հեկտար կամ 625 քառակուսի կիլոմետր: Արմավիրից Գյումրի, ուղիղ գծով 70 կմ է: Անտառի 9կմ լայնության դեպքում կունենանք 10 միլիոն ծառ: Դար ու փոսերը չենք հաշվում, քարքարուտներն ու աղուտները չենք հաշվում, 2-3 տարվա խնամքը`ջրել, պարարտացնել, անկենդան տնկիները փոխարինելը, չենք հաշվում: Հաշիվը կորցրել են։

Հեղափոխական պատգամավորը հայտարարում է` նախկին պաշտոնյաներից մեկի առանձնատան արժեքը 300 մլն դոլար է: Դա բավարար է 1 տարի մեր ՊԲ-ն ֆինանսավորելու համար: Թվերը այնպիսին են, որ ընդդիմությունը պապանձվում է, հաշիվը կորցնում:

ԱՄՆ-ի պատմության մեջ ամենաթանկ առանձնատունը հանվել է վաճառքի: Գինը 250 մլն դոլար: Փորձագետները գտնում են, որ գինը արդարացված է: Շքեղ առանձնատունը գտնվում է Լոս Անջելեսի մեկուսացված հատվածում, բարձրունքի վրա; Տանը կա ամեն ինչ, որ կարող է անցնել միլիարդատիրոջ մտքով հանգիստը և զվարճանքը կազմակերպելու համար: Առանձնատունը զարդարում են արվեստի 130 գործ: Տան գնի մեջ է մտնում նաև 30 միլիոն դոլար ընդհանուր արժողությամբ պատվերով արտադրված 12 շքեղ ավտոմեքենա, Rolls-Royce, Bugatti, և այլ: Տանիքի վրա կանգած է ուղղաթիռ, մոտակա նավահանգիստում զբոսանավ և այլն ևայլն: Առանձնատունը գնորդ առայժմ չունի: Մինչ այսօր ԱՄՆ-ում վաճառված ամենաթանկ առանձնատան գինը եղել է 100 միլիոն դոլար:

Վաճառքի է հանված նաև ՌԴ ամենաթանկ առանձնատունը: Այն գտնվում է մերձմոսկովյան ամենավարկանիշային շրջանում` Ռուբլյովսկի-Ուսպենսկի մայրուղու մոտակայքում: 19000 քառակուսի մետրանոց կառույցները գտնվում են 3 հեկտար հողամասի վրա: Ունի գոլֆի դաշտ, ծածկի տակ: Օլիմպիական չափսերի` 50 մետրանոց լողավազան: Եվ այլն, և այլն: Գինը 75 միլիոն դոլար: Գնորդ չկա:

Հաշիվը կորցրել են:

Կորոնավիրուսն էլ մի կողմից: Պարետը ԱԺ ամբիոնից հիմնավորում է հատուկ դրությունը երկարաձգելու անհրաժեշտությունը՝ եթե որևէ միջոցառում չձեռնարկեինք առաջին դեպքի արձանագրումից 75-80-րդ օրը միաժամանակյա հիվանդների թիվը կհասներ բնակչության 89 տոկոսին, Երևան քաղաքում միաժամանակ վարակված կլիներ 110000 մարդ:

Խնդիր միջին դասարանի դպրոցականների համար` որքա՞ն է Երևան քաղաքի բնակչությունը:

Հետագա մոդելավորված թվերը ֆանտաստիկ ֆիլմից էր:

Պարետը, եթե հաշիվը չի կորցրել, իր ելույթը պատրաստելիս կարող է, արդյոք, նման սխալներ թույլ տալ, իհարկե՝ ոչ: Կարող ենք մտածել, որ ելույթը պատրաստել էր առողջապահության նախարարը, ինքն էլ ժամանակ չէր ունեցել անգամ հայացք գցել ելույթին: Բայց ելույթը կարդալուց այդ թվերը իրեն ոչինչ չասացին:

Առողջապահության նախարարը 4-ը ու 14-ը չի տարբերում: Եթե ինքնամեկուսացման համար 14 օր է նախատեսվում, ապա ինչպես է վարչապետը ինքնամեկուսացման 4-րդ օրը անց կացնում կառավարության նիստ: Առողջապահության նախարարը հաշիվը կորցրել է: Մայիսի 2-ին ներկայացնում է իրավիճակը կապված համաճարակի հետ`թոքաբորբ ունեցող 454 հոգի, ծանր վիճակում` 63, ծայրահեղ ծանր վիճակում` 28 հոգի: www.worldometers.info/coronavirus/ կայքում կարդում ենք` Հայաստան, ծանր և ծայրահեղ ծանր հիվանդներ, մայիսի 2-ին 10 հոգի, մայիսի 3-ին 10 հոգի: Որտեղից է տվյալներ ստանում կայքը. ՀՀ առողջապահության նախարարությունից:

Իշխանությունները ևս մեկ ամիս երկարաձգում են արտակարգ դրությունը: Պարետը զեկուցում է` մայիսի 18-ից կաշխատի տրանսպորտը և մետրոն, մայիսի 25-ից պարտադիր կլինի դիմակներ կրելը:

Էս կորցրած հաշիվը մի թաքուն անկյունից ծիծաղում է մեզ վրա: Կորցրածը էլ հետ չես բերի, ասում է ժողովուրդը: Եկեք այս անգամ չհավատանք ժողովրդական ասացվածքին, բոլորս միասին ման գանք, կորցրած հաշիվը գտնենք ու վերադարձնենք իշխանություններին, թե չէ սրա վերջը կլինի անհաշիվ:

 

Արմեն Ստեփանյան